Det blir ikkje noko sal av garden eller holmen som Guro Vågen eig. Det må i så fall bli over hennar lik. Ikkje er ho og sonen godvener heller. Men når førstebetjent Arthur Andersen og kona Klara kjem på ferie til øyparadiset i Sunnhordland, får dei den beste kontakt med henne og skal få vere med på krabbefiske. Samstundes er det klart for sommarfestival på øya, og folk får bruk for alt muleg som driv og rek i fjøresteinane. Blant anna nokre uvanlege plastposar med mjukt innhald. Og her går folk omkring som er ekstra interesserte i akkurat slike. Brått blir det klart at det har skjedd skumle saker på få timar, ei vakker sommarnatt som skulle ha vore still og fredeleg. Og uhyggelege samanhengar blir tydelege etter som dei siste bitane i handlingmosaikken kjem på plass.