Mae’r teitl tafod-yn-y-boch a ddewisodd y bardd ar gyfer ei gasgliad yn paratoi rhywun ar gyfer rhychwant y cerddi ac, yn bwysicach efallai, eu naws. Ceir amrywiaeth o themâu o fewn y pymtheg ar hugain o gerddi a gyflwynir yn y casgliad yma ond maent yn creu dilyniant digon naturiol: partneriaethau o bob math, byd dinesig/trefol, arferion cymdeithas gyfalafol feddiangar, dylanwad teledu a chyfryngau eraill, sefyllfa ddiwylliannol Cymru a rhagolygon yr iaith, barddoni ac athronyddu. Os yw hynny’n swnio’n ormod o bwdin, rhaid pwysleisio fod hiwmor yn agos i’r wyneb mewn nifer fawr o gerddi; mae ganddo hefyd ryw osgo hunan-ddychanol sy’n gwneud i rywun wenu. • Llais newydd, ffres yn ymdrin a phynciau oesol mewn cyd-destun cyfoes. • Mae’n bwrw goleuni ar ein ffordd o fyw heddiw, mewn ffordd lled-ogleisiol.