8. november 1920 opna Olav K. Henden børse- og sykkelverkstad i ein kjellar i Sandane sentrum. 100 år - og fleire hamskifte - seinare har kjellar-verkstaden vakse til ein moderne sports- og fritids-butikk i Intersport-kjeden. I alle desse tiåra har butikken vore eit viktig innslag i dagleglivet i sentrum og leiarane sentrale personar i utviklinga av lokalsamfunnet. Olav K. Henden 1920-2020. Selskapet - Slekta - Samfunnet fortel om denne utviklinga og om den familien som har drive verksemda i tre generasjonar. Men boka er også eit bidrag til forteljinga om korleis tettstaden Sandane vaks fram frå slutten av 1800-talet. Boka er illustrert med nær 200 fotografi, mange av dei historiske bilda har ikkje vore viste før.